إفتكاسات للكاتبة أمل كُريم
recent
أخبار ساخنة

تابعنا على جوجل نيوز


Google search

إفتكاسات للكاتبة أمل كُريم

إفتكاسات


عم الجمدَّان عامل قلبان في كل مكان .. قالك دانا واد فلته ومطرقع ... طأت في دماغه .. قالك فكره، دي حتة فكره .. وبأفكاري أنا جبت التايهه ... عالم فكسان .. مليان قلبان وحبة تقاليع كده مش جايبه .. قالوا عنها جديد كده مُستحدث؛ إنما في الأصل لو جيت دورت ع أساسها؛ تلاقيها تقليعة لا ليها أصل ولا فايدة.

حياتنا بقت عبارة عن شوية إفتكاسات فوق بعض؛ على حبة عالم فكسانه في الرايحه والجايه مقابلانا .. ظاهرة سلوكية غريبة انتشرت مؤخراً زي غيرها من الظواهر المجتمعية .. موضوع يبان عادي وسطحي لكنه محتاج النظر في أمره وتسليط الضوء عليه بشكل ما .. و علشان كده في موضوع النهارده هنتكلم عن:

  • معنى الإفتكاسات.
  • أمثلة للإفتكاسات.

إفتكاسات للكاتبة أمل كُريم
إفتكاسات للكاتبة أمل كُريم


يعني إيه إفتكاسه؟


دي حاجة كده م اللي هي .. مصدرها دماغ لولبية ومش هنقول دي مهلبية .. شوية حروف شبه الرتوش مش مفهومة على كام فكرة غير معلومة ..

فقالوا أسطورة، قُلت دي صورة .. قالوا دي حكاية جيل، فقُلت من غير تطبيل "جيل عَّدمان .. جيل تعبان .. جيل مَّلان وجايب أخره .. يبان مَليان كده من بره تدَّور جواه تلقاه فاضي .. تبني ما تبنيش أساسه مفيش فبلاش تشويش كده ع الفاضي".

طب زي ايه الإفتكاسات دي:


• زي لعبة "الصبارة الراقصة" دي لعبة على شكل نبات صبار بترقص وتردد نفس الكلام .. افتكستها الصين للتسالي .. و انتشرت في دول العالم .. ومن كتر الطلب عليها سعرها بقى في العالي.

- البعض شاف انها خطر على الأطفال وبتأثر على التواصل اللفظي للطفل .. وبتكرار استخدامها الطفل بينعزل عن المحيط ومع الوقت بيُصاب بمرض "التَوحُد" أو مرض "الإيكولاليا" او ما يسمى بالبغبغاء.

- والبعض الأخر شاف انها وسيلة لتخفيف الضغوط وتحسين المزاج للكبار والصغار .. واعتبروها "مُحفز للكلام" عند الأطفال اللي بيعانوا من تأخر النطق.

•• زي كمان إفتكاسة ال"Sweet Little Rain" سويت ليتل رَيَن، في مدينة شنغهاي الصينية .. و دي أحدث إفتكاسات القهوة، عبارة عن فنجان قهوة من غير سكر، فوقه غزل بنات على شكل خيمة بتدوب من البخار المتصاعد من الفنجان وبتختلط بالقهوة .. وبالرغم من انه مشروب يبان من بره جامد، إلا إنه كان عليه تعليقات سلبية .. زي ان الفنجان بيبقى ملزق من بره، وغير صالح للشُرب.

••• في نوع أخر من الإفتكاسات و ده بقى حدث ولا حرج .. أساسه بيبقى كلام متفبرك .. نتيجة لتعرض الشخص لموقف مُحرج او مُشكلة فبيبدأ يعيشها ع نفسه وعلى غيره .. ويدخل بقى في دائرة الإفتكاسات.. زي مثلاً؛ الراجل اللي قضى ليلته بره البيت ولما رجع لقى مراته في وشه؛ فقالك أوبااا .. وقعت ومحدش سمى عليا.. وعلشان ينجا بحاله افتكسله افتكاسة "صاحبه اللي خبطته عربية، وأنه أضطر يا عيني يفضل معاه لحد ما فاق واطمن عليه بنفسه .. طبعاً مبقاش في ست بتاكُل م الكلام ده دلوقت بس ما علينا.

•••• وأخيراً وليس أخراً أحدث إفتكاسات عيد الحب لعام ٢٠٢٢ .. واللي احتل فيها المركز الأول وبجدارة بوكس "قُلة حُبنا".. وبوكس "عبد الغفور البرعي وفاطنة كُشري" .. وبوكيه الشوكولاتة اللي مفيش غنى عنه .. ده غير بقى هدية "أفيشات الأفلام" واللي بتحتوي جواها على شكولاتات وفواحات وشموع عطرية .. وكمان "كانز الفرحة" وده كانز معدني بيبقى جواه برفيوم أورچينال ورسايل حب؛ وله مفتاح شبه مفتاح كان المشروبات الغازية.

وغيرها ... من الإفتكاسات اللي مابتخلصش.

وفي الختام نقدر نقول إن الإفتكاسات سلاح ذو حدين، لكن أضراره اكتر من نفعه .. فياريت نبص لقدام شوية، وقبل أي إفتكاسات نشوف رايحين على فين يا بتوع الإفتكاسات؟
google-playkhamsatmostaqltradent