لو أول مرة تدخل موقع راموس المصري، فأحب أرحب بيك، وأحب أطمنك إنك في المكان الصح. أنا هنا مش بروج لأي تطبيق، ولا باخد مصلحة من أي جهة، أنا زيك بالضبط.. واحد بيجرب تطبيقات الربح اللي بتظهر في الإعلانات، وكل اللي يهمني أقولك الحقيقة كاملة علشان متضيعش وقتك ومجهودك على الفاضي.
النهارده هكلمك عن لعبة اسمها Supermarket Tour. يمكن شفت إعلانها على فيسبوك أو يوتيوب، ووعدوك إنك هتكسب منها فلوس بسهولة. خليني أقولك من البداية، تجربتي كانت مفيدة جدًا، مش علشان كسبت، لا، علشان فهمت اللعبة دي ماشية إزاي، وهحكي لك القصة بالتفصيل كأنك معايا خطوة بخطوة.
 |
| هل فعلاً Supermarket Tour بتكسب؟ تجربتي بكل صراحة |
يعني إيه Supermarket Tour أصلاً؟
اللعبة بسيطة جدًا، بتعتمد على إنك تجمع 3 حاجات شبه بعض، وتعملهم تطابق علشان يختفوا من الشاشة. شكل اللعبة لطيف، وفيها أرفف زي السوبر ماركت فعلًا، وكل مستوى فيه حاجات متبعثرة، وانت لازم ترتبهم وتخلص منهم.
في البداية بتدخل على اللعبة، بيظهرلك شرح صغير كده يوضحلك إزاي تشتغل عليها. الدنيا سهلة، والصراحة بتديك إحساس إنك هتكسب بسرعة، خصوصًا إن أول كام مستوى بتعديهم في أقل من دقيقة، وده اللي بيخلي الناس تتشجع وتكمل.
أول انطباع بعد التثبيت
أنا حملت اللعبة على موبايل أندرويد، وملقتش مشاكل، بس لاحظت إن في أكتر من لعبة بنفس الاسم أو اسم قريب منه، فلازم تتأكد إنك نزلت النسخة اللي معمولة من شركة اسمها KDECPU. الشركة دي أنا أعرفها كويس لأن جربت ليهم لعبة تانية قبل كده اسمها Beauty Party، وكانت نفس الفيلم بالظبط، شكلاً وموضوعًا.
بعد ما تدخل اللعبة، مش هتحتاج تعمل حساب أو تسجل بياناتك، بس ممكن تضيفهم بعدين من الإعدادات لو حبيت.
اللعبة بتشتغل إزاي بالظبط؟
الفكرة كلها إنك تحرك العناصر الموجودة على الشاشة علشان تعمل منهم مجموعات من 3 شبه بعض. في تحت الشاشة شوية أماكن إضافية تقدر تحط فيهم العناصر مؤقتًا، علشان تقدر توصل للحاجات اللي فوق، بس الأماكن دي محدودة، ولو استخدمتها كلها ومقدرتش تكمل، بتخسر الجولة.
بعد ما تخلص كل العناصر من على الشاشة، اللعبة بتقولك مبروك وبتديلك "مكافأة"، والمفروض تعمل "قبول" علشان تحصل عليها. بس هنا بقى بيبدأ الفيلم الحقيقي..
هل فعلاً Supermarket Tour بتدفع؟
دي كانت اللحظة اللي استنيتها.. وصلت للمستوى الخامس، واللعبة قالتلي إن دلوقتي أقدر أطلب الفلوس. طبعًا، فرحت، لأن كل حاجة كانت ماشية تمام، بس الصدمة كانت بعد كده.
أول ما طلبت الدفع، ظهرلي إن لازم أتفرج على فيديو. قلت تمام، مش مشكلة. بعد كدا، طلب تاني، وتالت، وكل مرة يقوللي إن في خطوة بسيطة علشان أستلم الفلوس، وكل خطوة كانت فيديو جديد، لدرجة إني حسيت إني اتسحبت جوا دايرة مفرغة من الطلبات.
الموضوع فضل كده، وكل ما أحاول أستلم حاجة، ألاقي شرط جديد، أو فيديو جديد، أو يقول لي "حصل خطأ، حاول تاني".
طيب هل في حد فعلًا كسب منها؟
أنا دورت كتير، سألت ناس، دخلت جروبات على فيسبوك وتويتر، وكل اللي لقيته هو شكاوى من ناس بتقول إن اللعبة وهم، وكلهم اتضحك عليهم. مفيش أي دليل حقيقي على إن حد سحب منها فلوس فعلًا. وكل اللي حصلوا عليه هو طلبات وشروط متكررة، وضياع وقت ومجهود على الفاضي.
ليه في ناس كتير بتقع في الفخ ده؟
ببساطة، لأن اللعبة معمول لها إعلانات جذابة جدًا، وبتستغل نقطة إن الناس عايزة تكسب فلوس من الموبايل. أول ما يدخل المستخدم اللعبة، بيلاقيها سهلة وسريعة، وده بيخليه يحس إن الطريق للربح بسيط. بس الحقيقة مختلفة تمامًا.
كل ده بيتكرر مع مئات الألعاب التانية اللي نفس الشركة بتنزلها بأسماء مختلفة، ونفس الفكرة، ونفس الأسلوب، وكلهم بيعتمدوا على إنك تتفرج على فيديوهات كتير وتنفذ شروط كتير، وهما يكسبوا من وراك، وانت ترجع صفر اليدين.
التطبيق ده نصب ولا لأ؟ الحقيقة المرة
للأسف، ومن غير أي لف أو دوران، أقدر أقولك بكل ثقة: Supermarket Tour لعبة وهم، ومجرد تطبيق نصب بيستغل المستخدمين. مفيش أي مصداقية، ولا في أي حد بيكسب منه بجد.
هي نوع من الألعاب اللي بتتعمد إنها تديلك أمل كاذب، وتخليك تفضل تلعب وتكمل، وكل ده علشان تتفرج على فيديوهات وتنفذ شروط أكتر، وفي الآخر، ولا هتشوف مليم.
طب نعمل إيه بقى؟
لو كنت بتدور على طرق حقيقية تكسب منها من موبايلك، فمتضيعش وقتك على الألعاب الزائفة دي. في تطبيقات محترمة فعلاً بتدفع، سواء من خلال مشاهدة الفيديوهات، أو تنفيذ المهام، أو حتى كتابة المحتوى. المهم إنك تدور على تقييمات حقيقية، وتسمع من ناس فعلاً جربت وسحبت.
وعلشان متقفش هنا، هتلاقي روابط لمقالات تانية على راموس المصري فيها قوائم لأفضل التطبيقات اللي ممكن تكسب منها بجد، وكلهم مجربين ومعروفين. وبرضوا تابع قناة منوعات راموس على التليجرام وتابع صفحة محمود محمد على لينكداين وهتلاقي لينكداين في روابط التواصل الاجتماعي في أول الصفحة دي من فوق خالص أو أي صفحة تانية.
الأسئلة الشائعة حول تطبيقات الربح من الألعاب
هل كل الألعاب اللي بتوعد بمكافآت مالية بتكون نصب؟
مش كلها، بس نسبة كبيرة بتستخدم الوهم ده لجذب المستخدمين لتحقيق أرباح.
إزاي أعرف إذا كانت اللعبة فعلاً بتدفع ولا لأ؟
دور على تقييمات حقيقية وتجارب مستخدمين على المواقع والمنتديات قبل ما تبدأ.
هل في ألعاب فعلاً بتكسب منها فلوس؟
آه، في بعض الألعاب الموثوقة، بس بيكون الربح منها بسيط ومحتاج وقت ومجهود.
هل مشاهدة الفيديوهات وتنفيذ المهام في اللعبة معناها إني هكسب؟
مش بالضرورة. بعض التطبيقات بتستخدم دا علشان تكسب هي وانت ما توصلش لحاجة.
إيه أفضل بديل موثوق لو عايز أكسب من الموبايل؟
مواقع المهام الصغيرة، تطبيقات كتابة المحتوى، أو استطلاعات الرأي المدفوعة تعتبر أفضل وأنسب.
الخلاصة: هل Supermarket Tour يستاهل وقتك؟
الإجابة المختصرة: لأ.
اللعبة مجرد وسيلة للربح لصاحبها فقط، وانت هتكون مجرد ضحية لو فضلت تلعبها وتأمل إنك تكسب منها. متقعش في نفس الفخ اللي ناس كتير وقعت فيه، وخلّي دايمًا عندك وعي بالتطبيقات اللي بتنزلها.
مفيش مانع تجرب، بس جرب وانت عارف الحقيقة كاملة، وأوعي تعتمد على كلام الإعلانات أو الوعود الكذابة.
وفي النهاية، بحب أشكرك على إنك قرأت تجربتي دي بالكامل، وبفكرك إنك تتابع موقع راموس المصري علشان تلاقي دايمًا تجارب حقيقية، ومراجعات صادقة لتطبيقات الربح من الموبايل. إحنا هنا دايمًا علشان نحمي وقتك ومجهودك، ونرشدك للطريق الصح. ولو حابب أعملك مراجعة عن تطبيق أو لعبة أو موقع قولي إسمها في التعليقات.