لو انت من الشباب اللي بيحلم يلبس البدلة العسكرية أو يقف وقفة ظابط شرطة بكل فخر، فالمقال ده ليك، ومن موقع راموس المصري جايبين لك كل التفاصيل اللي هتخليك تستعد صح، وتدخل من أوسع الأبواب، ومن غير واسطة. مستعد؟ يلا بينا.
أول حاجة: جهز نفسك من دلوقتي قبل ما البيان ينزل
الناس اللي بتستنى بيان المتحدث العسكري علشان تبدأ تجهز أوراقها وتفكر تعمل إيه، دول بيضيعوا وقت على الفاضي. أنت لازم تبدأ دلوقتي، مش لما الكل يجري تبدأ تجري معاهم.
فلو ناوي تقدم في الكلية الحربية أو كلية الشرطة، متخليش الخطوة الأولى تيجي متأخرة، إنت ممكن تبدأ تستعد من دلوقتي وتسبق غيرك بخطوات كتير.
المقولة اللي لازم تفضل في بالك
عارف المقولة بتاعة "من جدّ وجد ومن زرع حصد"؟ المقولة دي مش هزار، ومش مجرد كلام بيتقال وخلاص. هي سر النجاح، واللي ماشي بيها عمره ما يخسر. مش مهم إنك بتسمعها من ابتدائي، المهم تشتغل بيها دلوقتي.
أول خطوة: الورق اللي لازم تبدأ تجهزه
1. صور بطاقتك وصور شخصية
- هتحتاج تصور بطاقة الرقم القومي بتاعتك كذا نسخة.
- وهتروح الاستوديو وتتصور 12 صورة شخصية. آه، مش 8 بس، 12! لإنك ممكن تحتاجهم في أكتر من تقديم.
2. شهادة ميلاد مميكنة حديثة
- روح السجل المدني وطلع شهادة ميلاد جديدة، مش القديمة اللي عندك في الدرج من أيام زمان.
3. صور المؤهل الدراسي للوالدين
- دي من الحاجات اللي ناس كتير بتنسي تجهزها بدري، بس مهمة جدًا. صور المؤهل الدراسي للأب والأم وجهزها معاك.
4. القيد العائلي
- القيد العائلي ده محتاج مقال لوحده من كتر التعقيدات والمشاكل اللي بتحصل فيه، بس بشكل عام لازم تبدأ فيه بدري لأنه بياخد وقت، وممكن تطلب بطايق أعمامك أو أخوالك لو ظهروا في القيد.
لو معاك شهادة بطولة رياضية
لو ربنا كرمك ومعاك شهادة رياضية، فدي تعتبر تذكرة ذهبية. تقدر تعمل بيها بطاقة "الطلبة الممتازون"، والبطاقة دي بتديك مزايا كتير، منها إنها تسهّل عليك مراحل الكشف الطبي.
أوراق بتجهزها بعد ما تخلص ثانوية أو كلية
- شهادة حسن السير والسلوك من مدرستك أو جامعتك.
- شهادة إتمام المرحلة الثانوية (للي داخل من ثانوية).
- شهادة البكالوريوس أو الليسانس + شهادة الثانوية (للي داخل بعد الكلية).
ثانوية عامة أو أزهرية.
ندخل بقى في الجد: الكشف الطبي
ودا هتلاقي عنه شرح شامل في كل اختبارات كلية الشرطة بالترتيب وامتى تعمل في الكشف الطبي التماس وامتى تعيد الاختبار المهم ندخل بقا على الشرح:
عندك مشكلة؟ حلها دلوقتي!
لو حاسس إن فيك حاجة ممكن تأثر على كشفك الطبي:
روح لدكتور من دلوقتي، متستناش اللحظة الأخيرة.
مش معاك فلوس؟ مفيش مشكلة، خش على يوتيوب، هتلاقي فيديوهات لحل مشاكل بسيطة زي اللدغة أو تقوس الرجلين بدرجات بسيطة.
لو الموضوع كبير؟ لا، لازم دكتور بجد.
حاجات لازم تهتم بيها:
- أسنانك: نظف يوميًا، اعمل معجون كل يوم.
- أكلك: خليه صحي ومتوازن.
- الرياضة: العب بس بذكاء، ماترهقش نفسك.
- نومك: لازم تنام كويس، لأنه بيأثر على كل حاجة في جسمك، من مخك لقلبك لجهازك المناعي.
- صحتك النفسية: ما تهملهاش، لإنها بتأثر حتى على إصاباتك البدنية.
النظام الصح في التمرين
التمرين محتاج توازن:
- ساعة أو ساعتين في اليوم كفاية.
- متاخدش اليوم كله جيم وتسيب المذاكرة.
- جري مرتين في الأسبوع، لو في قرية العب في مركز شباب أو جيم.
- العب ضغط وعقلة كتير، بس سيب فرصة لعضلاتك تستشفى.
خليك مركز في التمارين: لو ماسك دمبل 10 عدات، حاول تطلع 12 أو 13، بس متزودش مرة واحدة من وزن 5 لـ20، كده بتأذي نفسك.
لو مش جبت المجموع… انسا كل ده!
آسف يعني، بس لازم أقولها: من غير مجموع، كل اللي فات مالوش لازمة. لازم تجيب المجموع المطلوب، لإن من غيره مش هتدخل أصلاً، حتى لو جمعت الورق كله وسويت الكشف.
موضوع الواسطة: الحقيقة بدون تجميل
لو بتسأل: أجيب واسطة؟ أكلّم حد؟ أدفع فلوس؟
بص، خليني أقولها بصراحة:
- في ناس دفعت فلوس وما دخلتش.
- في ناس كان معاها قريب ظابط وبرضه ما دخلتش.
الوسطات دي لو كانت حقيقية، بتتفلتر في كل مرحلة: طبي، رياضي، هيئة.
لو اللي دخل .. دخل بمجهوده، يبقى هو يستاهل. واللي دخل بفلوس ممكن كان يدخل أصلاً بمجهوده.
احذر من النصابين! بيمثلوا إنهم وسطاء وياخدوا فلوسك ويختفوا.
والأهم: لا تدفع فلوس لحد. ده اللي أقدر أقوله لك.
اللي مكتوب له يكون ظابط، هيكون. وربك بيكتب الأقدار. لو خايف، صلي، وادعي، وقرّب من ربنا.
متأخرش نفسك بنفسك
كل ما تجهز بدري، كل ما هتسبق غيرك، وكل ما تكون فرصك أعلى.
- متستناش حد.
- متقلدش حد.
- خليك فريد، واشتغل على نفسك.
في النهاية…
المقال دا اتعمل علشان الناس اللي بتحلم تدخل الكليات العسكرية أو الشرطة تلاقي دليل واضح وبالبلدي.
من موقع راموس المصري، بنقولك إن مفيش مستحيل، ومفيش حاجة اسمها واسطة أقوى من التمرين والمذاكرة والدعاء. خليك قد التحدي، واستعد من دلوقتي، وإن شاء الله تشوف اسمك في كشوف المقبولين قريب.
لو عندك أي سؤال، ابعت على لينكداين، أو سيبه في تعليق، هتلاقي الرد، ومحدش هيسيبك لوحدك.
وما تنساش:
✅ اشترك في القائمة البريدية
💬 سيب كومنت
📤 شارك المقال ده مع حد ناوي يدخل
ويا رب التوفيق لكل شبابنا اللي نفسهم يحققوا حلم البدلة العسكرية.
سلام عليكم، ومن راموس المصري بنقول لك: يارب نشُوفك ظابط قريب بإذن الله.